ரூபாய் 20 கோடி செலவில் முருகன் கோவிலுக்கு புதிய தங்க விமானம் விரைவில் அமைக்கப்படும் என அறங்காவலர்கள் பதவி ஏற்பு விழாவில் அறங்காவலர் குழுத் தலைவர் தெரிவித்தார். திருத்தணி சுப்பிரமணிய சுவாமி திருக்கோவிலின் நான்காம் ஆண்டு அறங்காவலர்கள் தேர்தல் இந்து அறநிலைத்துறை உதவி ஆணையர் அசோக்குமார் தலைமையில் நேற்று நடந்தது. இதில், நான்காவது முறையாக கோவில் அறங்காவலர் குழுத் தலைவராக மு.ஈஸ்வரப்பன் தேர்வு செய்யப்பட்டார். மேலும், ஏ.வி.சக்கரப்பன், கு.பாலகிருஷ்ணன், உஷாரவி மற்றும் பொன்குணசேகர் ஆகிய நான்கு அறங்காவலர்கள் தேர்வு செய்யப்பட்டது.

பதவி ஏற்பு நிகழ்ச்சி நேற்று காலை 11 மணிக்கு மலைக்கோவில் வள்ளி மண்டபத்தில் நடந்தது. கோவில் நிர்வாக அதிகாரி பரஞ்ஜோதி தலைமை வகித்தார். உதவி ஆணையர் அசோக்குமார் புதிய நிர்வாகிகளுக்கு பதவி பிரமாணம் செய்து வைத்தார். பின்னர் நடந்த கூட்டத்தில் அறங்காவலர் குழுத் தலைவர் மு.ஈஸ்வரப்பன் பேசியதாவது: கடந்த மூன்று ஆண்டுகளில் கோவிலில் கோவிலில் பல்வேறு வளர்ச்சி பணிகள் நடந்துள்ளன. பக்தர்களின் பல ஆண்டுகள் கனவாக இருந்த 9 நிலை ராஜகோபுரம் ஆறு கோடியில் கட்டும் பணிகள் நடந்து வருகின்றன. இன்னும் பத்து மாதத்தில் இப்பணி முடிவு பெறும். மாவட்டத்தில் உள்ள எந்த கோவிலுக்கும் இல்லாத தங்கவிமானம் 20 கோடி செலவில் இந்தாண்டுக்குள் கட்டி முடிக்கப்படும். பக்தர்களின் கோரிக்கையை ஏற்று சரவணப் பொய்கையில் உள்ள நான்கு புதை குழிகள் அகற்றப்பட்டு, தற்போது 25 லட்சம் செலவில் திருக்குளத்தில் வளர்ச்சி பணிகள் செய்யப்படுகின்றன. இதன் திறப்பு விழா விரைவில் நடைபெற உள்ளன.

எஸ்.ஐ., வெற்றிவேல் கொலை வழக்கில் மேலும் ஒருவர் கைது செய்யப்பட்டுள்ளார். நெல்லை மாவட்டம், ஆழ்வார்குறிச்சி சப்-இன்ஸ்பெக்டர் வெற்றிவேல், கடந்த மாதம் 7ம் தேதி அம்பாசமுத்திரத்தில் இருந்து மோட்டார் சைக்கிளில் வந்தபோது ஒரு கும்பலால் வெட்டிக்கொலை செய்யப்பட்டார். ஆள் மாறாட்டத்தில் நடந்த இந்த கொலையில், ஸ்ரீவைகுண்டத்தை அடுத்துள்ள வெள்ளூரை சேர்ந்த கந்தசாமி, அவரது சகோதரி சிவகாமி, ஓய்வுபெற்ற சப்-இன்ஸ்பெக்டர் சண்முகசுந்தரம் உட்பட ஏழு பேர் கைது செய்யப்பட்டனர். இவர்கள் தவிர ஆறு பேர், வெவ்வேறு கோர்ட்டுகளில் சரண் அடைந்தனர். ஸ்ரீவைகுண்டத்தை அடுத்துள்ள மங்களகுறிச்சியை சேர்ந்த பிச்சையா மகன் அம்மமுத்து(27) நேற்று கைது செய்யப்பட்டார். இவரும் கொலையில் முக்கிய குற்றவாளி என போலீசார் தெரிவித்தனர். இவருடன் சேர்த்து இந்த கொலையில் 14 பேர் போலீசில் சிக்கியுள்ளனர். மேலும் ஆறு பேரை தேடிவருகின்றனர்.

விழுப்புரம் அரசு மருத்துவக் கல்லூரியை மார்ச் 7ம் தேதி முதல்வர் கருணாநிதி திறந்து வைக்கிறார் என்று அமைச்சர் பொன்முடி கூறினார். விழுப்புரம் அடுத்த முண்டியம்பாக்கத்தில் அரசு மருத்துவ கல்லூரி மருத்துவமனை கட்டடம் கட்டி முடியும் தருவாயில் உள்ளது. கட்டுமான பணிகளை பார்வையிட்ட பின் அமைச்சர் பொன்முடி நிருபர்களிடம் கூறுகையில்,' மார்ச் மாதம் 7ம் தேதி காலை 10 மணியளவில் விழுப்புரத்தில் கட்டப்படும் தி.மு.க., அறிவாலயத்தை முதல்வர் கருணாநிதி, துணை முதல்வர் ஸ்டாலின் திறந்து வைக்கின்றனர். மாலை 4 மணியளவில் அரசு மருத்துவக்கல்லூரி மருத்துவமனையை திறந்து வைக்கின்றனர். விழா ஏற்பாடுகளை மாவட்ட நிர்வாகமும், தி.மு.க., நிர்வாகிகளும் தீவிரமாக செய்து வருகின்றனர்' என்றார்.

நேற்றைய செய்திகள்