மகாராஷ்டிரா முதல்வரின் இந்த பேச்சு, அனைத்து தரப்பினரையும் மேலும் குழப்பத்தில் ஆழ்த்தியுள்ளது. போனால் போகிறது என்று குஜராத்தி, இந்தி மொழி பேசுவோரையும் ஏற்றுக் கொள்வதாக அவர் தெரிவித்துள்ளார். அப்படியானால், இந்தியாவில் இந்த மூன்று மொழிகள் தான் உள்ளனவா? தமிழ், மலையாளம், தெலுங்கு உள்ளிட்டவை எல்லாம் மொழிகள் இல்லையா, என, மற்ற மாநிலத்தவர் மத்தியில் கேள்வி எழுந்துள்ளது.அசோக் சவான் குறிப்பிட்ட மூன்று மொழிகள் தவிர, மற்ற மொழிகள் பேசுவோர் மகாராஷ்டிராவில் டாக்சி ஓட்டக் கூடாதா? டாக்சி ஓட்டுவதற்கு லைசென்ஸ் கொடுப்பதற்கு இந்தியர் என்ற அடையாளமும், அவரின் டிரைவிங் திறமையும் போதாதா? இதில் இந்தி, குஜராத்தி, மராத்தி மொழிகள், டிரைவிங் லைசென்ஸ் வழங்குவதற்கான விதிமுறைகளில் எந்த அளவுகோளில் வருகிறது என தெரியவில்லை. தடி எடுத்தவன் எல்லாம் தண்டல்காரன் என்றால் எங்கே இருக்கிறது ஒருமைப்பாடு? இப்படி ஒவ்வொரு மாநிலத்திலும், புதிய கட்டுப்பாடுகள் விதித்தால் என்ன ஆவது என்பது தான் மற்ற மாநிலத்தவரின் கேள்வியாக உள்ளது.

மகாராஷ்டிராவில் துவக்கத்தில் இருந்தே, நாட்டின் ஒருமைப் பாட்டுக்கு சவால் விடும் நிகழ்வுகள் அரங்கேறிக் கொண்டு தான் இருக்கின்றன. ராஜ் தாக்கரே, பால் தாக்கரே போன்றவர்களால் மற்ற மாநிலத்தவருக்கு எதிராக வன்முறை தொடர்ந்து தூண்டி விடப்படுகிறது. மகாராஷ்டிரா சட்டசபையில், மராத்தி மொழியில் பதவியேற்க மறுத்த, சமாஜ்வாடி கட்சி உறுப்பினர் அபு ஆஸ்மி மீது ராஜ் தாக்கரே கட்சியினர் தாக்குதல் நடத்தினர்.

அப்போது காங்கிரஸ் கட்சி சார்பில் இதற்கு எதிர்ப்பு தெரிவிக்கப்பட்டது. எதிர்ப்பு தெரிவித்தவர்களில் முதல்வர் அசோக் சவானும் ஒருவர். தற்போது, குறிப் பிட்ட சில மொழிகள் பேசுவோருக்கு மட்டும் தான் இங்கு வேலை என, அறிவித்து இருக்கிறார். இதற்கு காங்கிரஸ் மேலிடம் என்ன பதில் கூறப் போகிறது. முதல்வரின் பேச்சை நியாயப்படுத்தப் போகிறதா? தேசிய ஒருமைப்பாட்டுக்கு வேட்டு வைக்கும், இதுபோன்ற அபாயகரமான போக்கை, மத்திய அரசு உடனடியாக தலையிட்டு இரும்புக் கரங்கள் கொண்டு தடுத்து நிறுத்த வேண்டும். அப்படி செயல்படாமல் மவுனம் காத்தால், நாடு முழுவதும் இதுபோன்ற விபரீதங்கள் அரங்கேறும் அபாயம் ஏற்படும். என்ன செய்யப் போகிறது மத்திய அரசு?.

மகாராஷ்டிரா நவநிர்மாண் சேனா தலைவர் ராஜ் தாக்கரே இந்த விஷயத்தில் வழக்கம்போல், தனது தடாலடி கருத்தை தெரிவித்துள்ளார். அவர் கூறியதாவது:இந்தி, குஜராத்தி மொழி பேசுவோருக்கும், மகாராஷ்டிராவில் டாக்சி ஓட்ட லைசென்ஸ் கொடுக்கப்படும் என, அரசு அறிவித்துள்ளது, துரதிர்ஷ்டவசமானது. இங்கு மராத்தியர்கள் மட்டுமே டாக்சி ஓட்ட முடியும். பிற மாநிலத்தவர் டாக்சி ஓட்டுவதை அனுமதிக்க முடியாது. அதை மண்ணின் மைந்தர்கள் பார்த்துக் கொள்வர். பீகார், உ.பி., மாநிலத்தவர் இங்கு வந்து தங்குவதற்கு மகாராஷ்டிரா மாநிலம் மடம் அல்ல.இவ்வாறு ராஜ் தாக்கரே கூறினார்.

நிதிஷ், சரத் யாதவ் கடும் ஆவேசம் : பீகார் முதல்வர் நிதிஷ் குமார் கூறுகையில்,"மகாராஷ்டிரா அரசின் இந்த போக்கு மிகவும் அபாயகரமானது. இதுபோன்ற விபரீதமான நடவடிக்கைகள், உடனடியாக தடுத்து நிறுத்தப்பட வேண்டும். மத்திய அரசு இந்த விஷயத்தில் தலையிட வேண்டும்' என்றார்.

ஐக்கிய ஜனதா தள தலைவர் சரத் யாதவ் கூறுகையில்,"டாக்சி டிரைவர்களுக்கு லைசென்ஸ் வழங்கும் விஷயத்தில், மகாராஷ்டிரா அரசு விதித்துள்ள கட்டுப்பாடுகள் முற்றிலும் தேவையற்றவை. பிரதமர் மன்மோகன் சிங், இந்த விஷயத்தில் தலையிட வேண்டும்' என்றார்.

மும்பையில் ஆயிரக்கணக்கான தமிழர்கள் டாக்சி டிரைவர்களாக உள்ளனர். இவர்களுக்கு, இந்தி, மராத்தி உள்ளிட்ட மொழிகள் சரளமாக பேசத் தெரிந்தாலும், எழுத, படிக்க தெரியாது. டாக்சி டிரைவர் தொழிலை நம்பி, பல தமிழ் குடும்பங்கள் அங்கு உள்ளன. அரசு விதித்துள்ள திடீர் கட்டுப்பாடுகளால், அங்குள்ள தமிழர்களுக்கு கடும் பாதிப்பு ஏற்படும்.புதிதாக வாடகை டாக்சி டிரைவருக்கான லைசென்ஸ் வேண்டுமானால், மராத்தி மொழி தெரிந்திருக்க வேண்டும் என கூறப்படுவதால், இந்த மொழி தெரியாத தமிழர்கள், லைசென்ஸ் பெற முடியாத நிலை ஏற்பட்டுள்ளது. எனவே, தமிழகத்தை சேர்ந்தவர்கள் அங்கு வாடகை டாக்சி ஓட்டுவது இனி, இயலாத காரியமாகவே இருக்கும். இதனால்,ஆயிரக்கணக்கான தமிழ் டாக்சி டிரைவர்களும், அவர்களை நம்பியுள்ள அவர்களின் குடும்பத்தினருக்கும் சிக்கல் ஏற்பட்டுள்ளது.

பீகார் முன்னாள் முதல்வரும், ராஷ்டிரிய ஜனதா தள தலைவருமான லாலு பிரசாத் யாதவ் கூறியதாவது: ராஜ் தாக்கரேயின் செயல்பாடுகளுக்கும், மகாராஷ்டிரா அரசின் இந்த அறிவிப்புக்கும் பெரிய வித்தியாசம் இல்லை. இந்திய அரசியல் அமைப்பு சட்டப்படி, நாட்டு மக்கள் அனைவரும், நாட்டில் எங்கு வேண்டுமானாலும் சென்று வேலை பார்க்கலாம். எனவே, மகாராஷ்டிரா அரசின் இந்த அறிவிப்பு அரசியல் சட்டத்துக்கு எதிரானது. அரசின் இந்த நடவடிக்கையால், டாக்சி தொழிலை நம்பியுள்ள ஆயிரக்கணக்கான வெளி மாநில தொழிலாளர்கள் வேலை இழக்க நேரிடும்.இவ்வாறு லாலு பிரசாத் யாதவ் கூறினார்.

மகாராஷ்டிரா அரசின் புதிய கட்டுப்பாடுகள் குறித்து, மும்பை டாக்சி யூனியன் தலைவர் குவாத்ரோஸ் கூறியதாவது: டாக்சி ஓட்டினால் தான் எங்கள் வீடுகளில் அடுப்பு எரியும். எங்களுக்கு எதிராக, அரசு ஏன் இப்படி ஒரு கட்டுப்பாட்டை விதிக்கிறது என, தெரியவில்லை. உள்நோக்கத்துடன் அரசு வெளியிட்டுள்ள இந்த அறிவிப்பை ஏற்றுக் கொள்ள முடியாது. மராத்தி மொழி தெரியாது என்பதற்காக, இந்த வயதில் பள்ளிக்கு சென்று அந்த மொழியை கற்றுக் கொள்ளவா முடியும்? இதுகுறித்து அடுத்து என்ன செய்வது என்பது குறித்து சட்ட நிபுணர்களுடன் ஆலோசித்து வருகிறோம்.இவ்வாறு குவாத்ரோஸ் கூறினார்.