தற்போது நான்கு தொகுதிகளை ஒதுக்கீடு செய்ய அ.தி.மு.க., முன்வந்துள்ளது. விருதுநகர், காஞ்சிபுரம் அல்லது திருவள்ளூர், ஈரோடு அல்லது பொள்ளாச்சி, தஞ்சாவூர் அல்லது ஆரணி ஆகிய தொகுதிகளில் நான்கு தொகுதிகள் ம.தி.மு.க.,விற்கு ஒதுக்கப்படும் என எதிர்பார்க்கப்படுகிறது. கட்சியின் எதிர்காலத்தை கருத்தில் கொண்டு, அ.தி.மு.க.,வுடன் தொகுதிப் பங்கீடு ஒப்பந்தத்தில் கையெழுத்திட ம.தி.மு.க., முடிவு செய்துள்ளது. இந்த முடிவு குறித்து இன்று மாலை தாயகத்தில் நடக்கும் மாவட்டச் செயலர்கள் கூட்டத்தில் அங்கீகாரம் வழங்கப்படவுள்ளது. மார்க்சிஸ்ட் கட்சிக்கு கன்னியாகுமரி, மதுரை, திண்டுக்கல் அல்லது திருப்பூர் தொகுதி ஒதுக்கீடு செய்ய அ.தி.மு.க., முடிவு செய்துள்ளது. இன்று மதுரையில் நடக்கும் மாநில நிர்வாகிகள் குழுக் கூட்டத்தில், அ.தி.மு.க., ஒதுக்கீடு செய்யும் தொகுதிகளை பெற்றுக்கொள்வது குறித்து விவாதிக்கப்படுகிறது.